To søndagar i advent - oppsummert

Me skal straks tenna tre lys, eg får vengjeslag!! Tida går so fort og det er so mykje som skjer, og eg gjer mitt for å henga med i svingane. Ikkje det enklaste, men når eg sit og kikkar på mobilbileta mine ser eg at eg har faktisk fått unna meir enn eg trudde! 

Mellom anna vert det ei jul der dei fleste gåvene er heimelaga! Det er slik både eg og slekta likar :-) Og då eg ikkje har introdusert bloggen for heile familien enno, vågar eg meg på å legga ut nokre foto av kva som har blitt til sidan sist.

Dette er ein av mine aller aller nyaste kreasjonar, håpar de ser kva det er... Den står no til tørk med ei formfull og flott flaske i, men innan jul vert nok den byta ut med litt edlare dropar - kjenner me Nissemor rett ;-)

Her er også ein liten luring som ventar på dei edlare dropar. Uglemønsteret vart til på Inside cafe i Bergenby, medan eg venta på at båten skulle frakta meg heim til Rosendal etter ei herleg helg i Oslo / Bærum, der eg hadde fått unna både julegaveshopping, konsert med Oslo Gospel Choir, familiebesøk og evigmykje kos.

Her er eit utsnitt av eine julesokken til ungane. Siste dag i november sette eg ideen min ut i live, akkurat i tide til at dei skulle få si første desember-overrasking!

Her er den i heilfigur. Dei vart temmelig skjønne - om eg må sei det sjølv! Håpar dei varer nokre år, og at dei gler ungane like mykje som dei er meint å gjera :-) Ganske pyntelege er dei også der dei heng!

Når ein er i hovudstaden er det lov å kjøpa byblom til seg sjølv vel? Denne falt eg for (mellom anna....) på Indiska, ein butikk nær mitt hjarta. Er den ikkje vidunderleg?! Eg tykkjer også det er eit fint alternativ til adventstjerne :-) Den kan eg ha i eit anna vindauge :-)

Ei julestjerne og to er sjølvsagt i hus. Vart både lukkeleg og overraska då min kjære kom heim med to stykk under armen - stolt som ein hane sjølvsagt :-)

Og heilt til slutt for i dag; eit vakkert foto tatt på veg til Oslo. SNAKK om winterwonderland! Jøye meg kor flott me har det :-)

Jul i Rosendal gav forresten meirsmak i år også, sjølv om me fekk smaka på kulden i mange timar! Me heldt varmen med koseleg atmosfære, julemusikk, gløgg og kakao - som seg hør og bør!